“Эко Алтан Заамар” ХХК -д гарсан ослын шалтгаан юу байв?

Төв аймгийн Заамар суманд үйл ажиллагаа явуулдаг “Эко Алтан Заамар” компанийн уурхайд өнгөрсөн 2-р сарын 28-нд осол болж, 4 хүн амь насаа алдсан хэрэг гарсан. Осолтой холбогдуулан тус компанийн үйл ажиллагаанд МХЕГ-аас хийсэн шалгалтын талаар мэдээлэл хийлээ. Шалгалтаар улсын байцаагчийн 9 заалттай дүгнэлт гаргаж 3-аар сарын 18-нд Уул уурхайн сайдад хүргүүлжээ. Уг компани нь

• Улсын комисст уурхайгаа хүлээлгэж өгөлгүйгээр  үйл ажиллагаа явуулж байсан,
• ТЭЗҮ шинээр боловсруулахдаа байгаль орчинд нөлөөлөх байдлын нарийвчилсан үнэлгээ хийгээгүй,
• ТЭЗҮ-д тусгагдсан зураг төслийн дагуу мөрдөгдөх ёстой параметр, уулын ажлын хэмжээсүүдийг баримтлаагүй зэрэг хэд хэдэн зөрчил илэрчээ.

Мөн Гидрогеологийн усны судалгаагаар 51 метрт уст үе байгааг компани мэдэж байсан ч устай үеэс хэрхэн зайлуулах, болзошгүй эрсдэлийг бууруулах талаар зураг төсөлд тусгаагүй нь гулсалт үүсэх гол шалтгаан болсон гэдгийг онцоллоо. Үүнээс гадна, хөдөлмөрийн аюулгүй байдлын хэд хэдэн заалт зөрчигджээ. Тухайлбал, Хөдөлмөрийн аюулгүй байдал, эрүүл ахуйн дотоод хяналтын зөрчилтэй бөгөөд нэгдүгэрт, ажлын байрны зааварчилгааг журам ёсоор хийхгүй байна гэдгийг эрсдэлийн үнэлгээгээр гаргаад ирсэн. Мөн мөс хагарч унахаас болж насосчид, ажилчид мөсөнд даруулах, техник хэрэгсэл эвдрэх аюултайг  Хөдөлмөрийн аюулгүй байдлын мэргэжилтэн нь тооцоолж анхааруулсан ч компаний захирал нь үнэлгээний мөрөөр зөрчил арилгах арга хэмжээн аваагүй ажээ.