З.Мэндсайхан: "Онтрэ" компани татварын 24,5 тэрбумыг шилжүүллээ гээд бид лицензээ шилжүүлнэ гэсэн үг биш!

УИХ-ын гишүүн О.Батнайрамдал нар Онтрэ манай улсад мэдэгдэхгүйгээр лицзензээ зарж, тиүүнээ баталгаажуулах гэж 24,5 тэрбумын татварын мөнгө шилжүүлсэн. Үүнийг манай улс буцааж шлжүүлэх ёстой гэсэн байр суурийг илэрхийлээд буй. Уг асуудлаар Сангийн сайд З.Мэндсайханы байр суурийг тодрууллаа.

Сангийн сайд З.Мэндсайхан:

-"Онтрэ" компаниас шилжүүлсэн 24.5 тэрбум төгрөг бол татвар төлөгч өөрөө үүсгэсэн нэхэмжлэл, үүний төлөө лиценз шилжүүлэхгүй.

Харин Засгийн газраас УИХ-д өргөн мэдүүлсэн 2027 оны төсвийн төсөлд "Оюутолгой" төслөөс авах ногдол ашгийг 3 их наяд төгрөг байхаар тусгасан. Энэ нь Засгийн газар болон "Рио Тинто" группын хооронд хийсэн хэлцлийн үр дүнд 2037 онд авах байсан ногдол ашгийг 10 жилээр наашлуулж буй хэрэг юм. Дээрх хөрөнгийн 1 их наяд төгрөгийг Хуримтлалын санд төвлөрүүлж, үлдсэн 2 их наядыг эрчим хүч болон нийгэм, эдийн засгийн тулгамдсан асуудлуудыг шийдвэрлэх хөрөнгө оруулалтад зарцуулахаар төлөвлөсөн.

Энэхүү хөрөнгийг бэлэн мөнгө хэлбэрээр тараах асуудал яригдаагүй. Хуулийн хүрээнд суурь асуудлуудыг шийдвэрлэхэд чиглэнэ.

УИХ-ын гишүүн О.Батнайрамдалын зүгээс "Онтрэ" (Entrée Resources) компанийн эзэмшиж буй "Жавхлант", "Шивээ толгой" лицензүүдийг шилжүүлэхтэй холбоотойгоор Засгийн газрыг нууц гэрээ байгуулах гэж байна гэж хардаад байгаа юм.

Гэвч үнэндээ "Оюутолгой" төслийн хувь нийлүүлэгчдийн гэрээг сайжруулах ажлын хэсэг үүргээ биелүүлж, зээлийн хүү болон хугацаа, ногдол ашгийн асуудлыг Монгол Улсад ашигтайгаар шийдвэрлэсэн. Засгийн газар ямар нэгэн нэмэлт үүрэг хүлээгээгүй бөгөөд бүх үйл ажиллагаа нээлттэй явагдаж байгаа.

"Онтрэ" компани өнгөрсөн зургадугаар сард лиценз шилжүүлсний татвар хэмээн 24.5 тэрбум төгрөгийг төлсөн нь тухайн компанийн өөрсдийнх нь гаргасан шийдвэр. 2019 оны Татварын багц хуулийн шинэчлэлээр татвар төлөгч өөрөө нэхэмжлэл үүсгэж, урьдчилж татвар төлөх боломжтой болсон. Банкны гүйлгээний утга "3"-ын тоогоор эхэлсэн байгаа нь татварын байгууллагаас нэхэмжлээгүй, харин компани өөрөө нэхэмжлэл үүсгэснийг гэрчилж байгаа юм.

Энэхүү төлбөрийг шилжүүлснээр лиценз шилжүүлэх тодорхойлолт авах гэсэн шахалтыг компаниас үзүүлж байгаа. Гэхдээ Татварын ерөнхий газраас тус компанид хоёр удаа албан ёсны хариу өгөхдөө, лиценз шилжүүлэх асуудал УИХ-ын тогтоол, шийдвэрийн хүрээнд шийдэгдэх ёстойг сануулсан. Мөн ордын нөөц тогтоогдоогүй, нарийвчилсан ТЭЗҮ байхгүй нөхцөлд компанийн өөрсдийнх нь үнэлгээгээр татварын тодорхойлолт гаргаж өгөх боломжгүй гэдгийг мэдэгдсэн.

Хуулийн дагуу татвар төлөгч урьдчилж төлсөн татвараа буцаан авах хүсэлт гаргах эрхтэй боловч одоогоор тийм хүсэлт ирээгүй байна.

О.Батнайрамдал гишүүний хувийн амбиц, улс төрийн зорилгыг гүйцэлдүүлэхийн тулд би хууль зөрчиж болохгүй. Байгалийн баялагтаа санаа зовж байгаа нь зөв боловч нийгэмд буруу мэдээлэл түгээж, олон нийтийг төөрөгдүүлж болохгүй.

"Онтрэ"-ийн гэрээ хэлэлцээрийг УИХ-аар оруулахгүйгээр шийдвэрлэх ямар ч эрх зүйн үндэс байхгүй.

Сэтгэгдэл (0)

Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.

Одоогоор сэтгэгдэл байхгүй байна. Та анхны сэтгэгдлийг бичээрэй.