Гавьяат малын эмч Ц.Өлзийтогтох: Вакцин шахахын тулд шүлхий өвчнийг зориудаар тарааж, хорлон сүйтгэх үйл ажиллагаа явуулж байна

Монгол Улсын гавьяат малын эмч Өлзийтогтох нь био технологийн салбарт 30 гаруй жил ажилласан, вакцин болон оношлуур үйлдвэрлэлийн туршлагатай мэргэжилтэн юм.

Тэрээр хөдөө орон нутгаар явж, мал аж ахуйн салбарт тулгамдаж буй бодит асуудлуудыг ажиглан, мэргэжлийн дүгнэлтээ хуваалцаж байна. Өнөөдөр уламжлалт бэлчээрийн мал аж ахуй доройтож, залуу халаа тасарч байгаа нь хамгийн том асуудал болоод байна.

Залуус хот суурин бараадан, малчдын олон талт ур чадвар, эртний ухаан мартагдах шатандаа оржээ. Үүнийг дагаад малын гаралтай бүтээгдэхүүнээ уламжлалт аргаар боловсруулах соёл алдагдаж, малчид зөвхөн түүхий сүүгээ борлуулан өдрийн орлогоо аргацаах болсон байна. Мөн арчилгаа их шаарддаг бог малаас татгалзаж, адуу, үхэр голлон маллах болсон нь хүнсний аюулгүй байдалд сөргөөр нөлөөлөх эрсдэлтэйг тэрээр санууллаа. Төр засгаас бэлчээрийн мал аж ахуйг хоцрогдсон гэж үзэж, фермерийн аж ахуйг хэт туйлшран дэмжиж байгаа нь буруу бодлого юм.

Дэлхий нийтээр байгалийн цэвэр бүтээгдэхүүн өгдөг нүүдлийн аж ахуйг чухалчлах болсон атал манай улс бэлэн байгаа давуу талаа устгаж байна. Энэхүү хандлагыг өөрчилж, уламжлалт бэлчээрийн аж ахуйгаа шинжлэх ухааны үндэслэлтэйгээр сэргээн хөгжүүлэх, малчдад мэргэжлийн боловсрол олгох шаардлагатай байна.

Малын халдварт өвчинтэй тэмцэх арга барил мэргэжлийн бус байгааг Өлзийтогтох эмч шүүмжлэв. Өвчилсөн мал сүргийг бүрэн устгахгүйгээр зөвхөн ил харагдах шинж тэмдэгтэй хэсгийг нь устгаж байгаа нь вирусийн голомтыг үлдээж буй хэрэг юм.

Мөн гадаадаас чанаргүй вакцин импортлон шахах нь эдийн засгийн үргүй зардал гаргахаас гадна малын биед сөрөг нөлөө үзүүлж байна. Мал эмнэлгийн салбарт шинжлэх ухаанч бус, хувийн ашиг сонирхолд хөтлөгдсөн шийдвэрүүд давамгайлж байгааг засаж залруулахыг тэрээр уриаллаа.