Хогоо хаях хогийн савгүй нийслэлийн иргэд бухимдалтай байна

Улаанбаатар хотын өнгө үзэмж, эрүүл ахуйн нэг томоохон асуудал бол гудамж талбай дахь хогийн савны хүрэлцээ юм. Иргэд соёлтой байхыг хичээж, хогоо ил задгай хаяхгүй байхыг эрмэлзэвч, хаях газар нь байхгүйгээс болж хогоо барьж явах, эсвэл халаасандаа хийхээс өөр аргагүй байдалд хүрч байна.

Энэхүү асуудал нийслэлийн иргэдийн дунд ихээхэн бухимдал төрүүлж байгааг бид газар дээрээс нь сурвалжиллаа. Сүхбаатарын талбайн урд байрлах автобусны буудлаас эхлэн хогийн сав хайх аялал маань нэлээд урт үргэлжлэв. Уусан ундааныхаа савыг хаях газар хайсаар Төв номын сан өнгөрч, Төв цэнгэлдэх хүрээлэн хүртэл алхсан боловч зам зуур нэг ч хогийн сав тааралдсангүй.

Энэ бол нийслэл хотын төв хэсэгт тулгамдаж буй бодит дүр зураг юм. Хотын төв гудамжаар хэдэн километр алхахад ганц ч хогийн сав олдохгүй байна гэдэг нь хотын дэд бүтэц ямар түвшинд байгааг илтгэнэ.

Иргэдтэй уулзаж санал бодлыг нь сонсоход бүгд л ижил зүйлийг хэлж байлаа. "Хогоо хаях газар олдохгүй болохоор байнга бариад явах хэцүү байдаг. Хүүхэдтэй явж байх үед бүр ч хүндрэлтэй. Заримдаа аргаа бараад халаасандаа хийгээд харьдаг" хэмээн нэгэн иргэн бухимдлаа илэрхийлэв.

Өмнө нь автобусны буудлууд дээр байсан хогийн савнууд яагаад алга болсныг иргэд гайхаж, ядаж тодорхой зайд том хэмжээний хогийн  савуудыг байршуулах шаардлагатайг онцолж байлаа.

Хүмүүс хогоо барьж явахаас төвөгшөөж, гудамж талбайд шууд хаях тохиолдол цөөнгүй гардаг. Сүхбаатарын талбай дээр ч хэвтэж буй хог хаягдал үүнийг гэрчилнэ. Хэрэв хогийн сав хүртээмжтэй байвал иргэд хогоо зориулалтын газар нь хаяж, хотын соёлд суралцах бүрэн боломжтой юм.

Эцэст нь дүгнэхэд, Улаанбаатар хотын гудамж талбай, автобусны буудлуудад хогийн сав зайлшгүй хэрэгтэй байна. Энэ бол зөвхөн нэг хүний асуудал биш, нийт нийслэлчүүдийн тав тух, хотын цэвэр цэмцгэр байдалтай холбоотой асуудал юм.

Тиймээс холбогдох албаныхан энэ асуудалд анхаарал хандуулж, хогийн савны хүртээмжийг нэмэгдүүлэн, нийслэл хотоо хамтдаа цэвэр байлгах нөхцөлийг бүрдүүлэх шаардлагатай байна.