Дуучин С.Жавхлан 2026 ширхэг модны суулгац үнэ төлбөргүй тараалаа
Гавьяат жүжигчин, дуучин Самандын Жавхлан Олон улсын хүүхдийн эрхийг хамгаалах өдрийг угтан 2026 оныг бэлгэдэн 2026 ширхэг модны суулгацыг иргэдэд үнэ төлбөргүй тараах арга хэмжээг Ялалтын талбайд зохион байгууллаа. Уг үйл ажиллагаа нь байгаль дэлхийгээ хайрлан хамгаалах, цөлжилттэй тэмцэхэд иргэдийн оролцоог нэмэгдүүлэх зорилготой "Тэрбум мод" үндэсний хөдөлгөөний хүрээнд өрнөсөн юм.
Үд дундын 13:00 цагт эхэлсэн уг арга хэмжээний үеэр уран бүтээлч "Энх цагийн дуулал" шинэ дуугаа анх удаа олон нийтэд танилцууллаа. Тэрээр өөрийн цахим хуудсаараа дамжуулан хүн төрөлхтний хорвоод үлдээх ёстой гурван зүйлийн нэг нь мод тарих болохыг онцлон, амралтын өдрүүдийг мод тарихад хамгийн тохиромжтой үе хэмээн иргэдийг уриалсан байна.
Цагдаагийн байгууллага энэхүү санаачилгыг дэмжин хамтран ажиллаж, иргэдэд хуш, бургас зэрэг модны суулгацуудыг гардуулан өгөв. Ийнхүү дуучин хүрэлцэн ирсэн эхний 2026 хүнд мод бэлэглэх амлалтаа биелүүлж, олон нийтийн анхаарлыг байгаль хамгааллын ажилд хандууллаа.
Тэрээр мод бэлэглэх үйл ажиллагаагаа үргэлжлүүлэн энэ сарын 29, 30-ны өдрүүдэд Дархан-Уул аймагт болох тоглолтынхоо үеэр зохион байгуулахаар төлөвлөжээ. Орон нутгийн иргэдтэй хамтран төгөл байгуулах энэхүү ажил нь ирээдүйд ногоон байгууламжийг нэмэгдүүлэх томоохон алхам болох юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.