Японы Хоккайдод бусдыг заналхийлж дээрэмдсэн Монгол иргэнийг баривчилжээ

Японы Хоккайдо мужийн Асахикава хотод 55 настай эрэгтэйг хутгаар заналхийлж, хүчээр бараа худалдан авхуулж, дээрэмдсэн хэрэгт Монгол  Улсын 22 настай иргэн Б.Баярмагнайг цагдаагийн газраас баривчлан саатуулжээ.

Тухайн этгээд нь тус улсад техникийн дадлагажигч ажилтнаар ирээд байсан бөгөөд хохирогчийг уулын бүсэд аваачиж биед нь халдсаны дараа их хэмжээний үнэ бүхий цахилгаан хэрэгсэл авхуулж, улмаар зугтсан хэрэгт буруутгаж байна.

Хэрэг явдал тавдугаар сарын 10-ны өдөр Камикава бүс нутагт эхэлсэн бөгөөд сэжигтэн этгээд хохирогчид хандан автомашинаараа дөхүүлээд өгөх хүсэлт тавьсан байна. Шибэцү хотын 55 настай албан хаагч түүнийг машиндаа суулгасны дараа сэжигтэн гэнэт хутга гарган заналхийлж, "Дуугүй байхгүй бол ална шүү. Надад хоёр сая иен өг" хэмээн шаардсан болохыг хууль хяналтын байгууллагын мөрдөн байцаалтаар тогтоожээ.

Энэхүү үйлдэл нь урьдаас төлөвлөсөн шинжтэй байсан бөгөөд сэжигтэн хохирогчийг айлган сүрдүүлж, өөрийн эрхшээлдээ оруулсан байна.

Үүний дараа сэжигтэн хохирогчийг алслагдсан уулын бүс рүү автомашинаар нь хүчээр авч явжээ. Тэнд байх хугацаандаа хохирогчийн биед халдаж, гар болон нүдний орчимд нь зүсэн хөнгөн гэмтэл учруулсан байна. Хохирогчийг шөнийн турш ууланд саатуулсны эцэст маргааш өглөө нь Асахикава хотын төв рүү дагуулан иржээ. Сэжигтэн этгээд хохирогчийг суллахаасаа өмнө өөртөө ашиг хожоо олох зорилгоор дахин дарамт шахалт үзүүлсэн байна.

Тавдугаар сарын 11-ний өглөөний 11:00 цагийн орчимд сэжигтэн хохирогчийг Асахикава хотын цахилгаан барааны дэлгүүрт дагуулан орж, 600 мянга орчим иен буюу ойролцоогоор 3800 ам.долларын үнэ бүхий компьютер болон бусад төхөөрөмжүүдийг хүчээр худалдан авхуулсан байна. Барааг өөрийн болгож авсныхаа дараа тэрээр хохирогчийг суллаж явуулсан бөгөөд хохирогч нэн даруй цагдаагийн хэлтэст хандан болсон явдлыг мэдүүлжээ. Цагдаагийн ажилтнууд эрэн сурвалжлах ажиллагааг шуурхай зохион байгуулж, сэжигтнийг хотын нэгэн интернет кафегаас олж баривчилсан юм.

Одоогийн байдлаар 22 настай сэжигтэн этгээд дээрэм хийж, бусдын биед гэмтэл учруулсан гэх ялыг хүлээн зөвшөөрөөд байгаа бөгөөд хэргийг прокурорт шилжүүлжээ.

 Цагдаа нар тэдний хооронд өмнө нь ямар нэгэн холбоо хамаарал байсан эсэхийг шалгаж байгаа ч урьдчилсан байдлаар бие биенээ танихгүй хүмүүс байсан гэж үзэж байна. Энэхүү хэрэг нь техникийн дадлагажигч ажилтнуудын хөдөлмөр эрхлэлт болон нийгмийн харилцаанд хяналт тавих шаардлагатайг сануулсан ноцтой үйлдэл боллоо гэж орон нутгийн хэвлэлүүд онцолж байна.