MV Hondius аяллын хөлөг онгоцонд аюултай вирус дэгдэж, 8 хүн халдвар авч, 3 хүн нас бараад байна

Аргентины Ушуайя хотоос хөдөлсөн Нидерландын далбаатай "MV Hondius" аяллын хөлөг онгоцонд Хантавирусын нэн аюултай "Андын вирус" (Andes virus) дэгдэж, одоогийн байдлаар найман хүн халдвар авч, гурван хүн нас бараад байна.

Дэлхийн Эрүүл Мэндийн Байгууллага (ДЭМБ) болон АНУ-ын Өвчний хяналт, урьдчилан сэргийлэх төв (CDC) уг дэгдэлтийн эсрэг яаралтай арга хэмжээ авч эхэлсэн бөгөөд 23 орны иргэдээс бүрдсэн 147 хүн уг хөлөг дээр зорчиж байсан юм. Халдвар авсан зорчигчдод уушгины хам шинж, халуурах, хоол боловсруулах эрхтний хямрал болон амьсгалын дутагдалд орох зэрэг хүнд хэлбэрийн шинж тэмдэг илэрч байгаа бөгөөд нас баралтын түвшин 38 хувьтай байгаа нь мэргэжилтнүүдийг түгшээж байна.

Андын вирус нь бусад Хантавирусаас ялгаатай нь хүнээс хүнд халдварлах чадвартай цорын ганц омог бөгөөд энэ нь халдварын эрсдэлийг эрс нэмэгдүүлж байгаа юм.

Ихэвчлэн мэрэгч амьтдын шээс, ялгадасаар дамждаг бол уг вирус нь өвчтөнтэй удаан хугацаанд ойр байсан хүмүүст халдварлах боломжтойг ДЭМБ албан ёсоор баталлаа. MV Hondius хөлөг онгоц Өмнөд Атлантын далайг гатлан Антарктид, Өмнөд Жоржиа, Гэгээн Елена арал зэрэг алслагдсан газруудаар аялж байх үед анхны тохиолдлууд бүртгэгдсэн байна.

Халдварын анхны тохиолдол дөрөвдүгээр сарын 11-нд бүртгэгдэж, нэгэн эрэгтэй зорчигч хөлөг онгоц дээр амьсгалын дутагдлын улмаас нас баржээ. Үүний дараа Гэгээн Елена арал дээр буусан түүний эхнэр болон өөр нэгэн зорчигч Өмнөд Африкийн эмнэлэгт хүргэгдсэн боловч биеийн байдал нь хурдан муудаж нас барсан байна.

Тавдугаар сарын 2-нд Герман Улсын иргэн болох дөрөв дэх зорчигч уушгины хатгалгаагаар нас барсны дараа ДЭМБ-д албан ёсоор мэдэгдэж, лабораторийн шинжилгээгээр Хантавирус болохыг тогтоожээ.

Олон улсын эрүүл мэндийн байгууллагууд өвчтөнүүдийг тусгаарлах, ойрын хавьтлыг тогтоох чиглэлээр эрчимтэй ажиллаж байна. Одоогоор халдвар авсан болон сэжигтэй тохиолдлуудыг Өмнөд Африк, Нидерланд, Герман, Испани, Франц, Швейцар зэрэг улсуудын төрөлжсөн эмнэлгүүдэд шилжүүлэн эмчилж байгаа юм. АНУ-ын CDC-ээс Канарын арлууд руу шинжээчдийн баг илгээж, хөлөг дээрх өөрийн улсын иргэдийг Небраска муж дахь тусгай био хамгаалалтын байгууламжид тусгаарлахаар бэлтгэж байна.

Хэдийгээр Андын вирус нь хүнээс хүнд халдварлах аюултай ч ДЭМБ-аас дэлхийн нийтэд учрах эрсдэл бага хэвээр байгааг онцолсон. Учир нь уг вирус нь зөвхөн шинж тэмдэг илэрсэн өвчтөнтэй маш ойр байх үед халдварладаг бөгөөд вирусыг тээгч мэрэгч амьтад зөвхөн Өмнөд Америкт байдаг ажээ.

Одоогийн байдлаар MV Hondius хөлөг онгоц Канарын арлуудыг чиглэн явж байгаа бөгөөд зорчигчдод ариун цэвэр сахих, бусадтай ойр байхыг хязгаарлах хатуу зааварчилгаа өгөөд байна.

Эх сурвалж:

• en.wikipedia.org

• who.int

• cdc.gov

• publichealth.lacounty.gov

• cdc.gov