Ахмадын амралт, сувиллын төвийг нийслэлд үнэ төлбөргүй хүлээлгэн өглөө

“Энэрэл нигүүсэл оюун билгийн төв” ТББ-аас Хан-Уул дүүргийн 21 дүгээр хороонд ахмадуудад зориулсан амралт, сувиллын төвийг барьж, нийслэлийн өмчид үнэ төлбөргүй шилжүүллээ.

 Нийслэлийн Засаг дарга Х.Нямбаатар уг төвийг ахмадуудад зориулсан чухал бүтээн байгуулалт болсныг онцолж, цаашид нийслэлийн зүгээс ногоон байгууламжийн тохижилт хийх, мөн хажууд нь спортын төв байгуулахаар төлөвлөж байгааг мэдэгдэв. Түүнчлэн төвийг тогтмол үйл ажиллагаатай байлгаж, нийслэлийн 204 хорооны ахмадуудад эрүүл мэнд, сэтгэл санааны дэмжлэг үзүүлэх зорилготойг дурдсан юм.

Мөн ирэх дөрөвдүгээр сард “Трамвай” төслийн гүйцэтгэгчийг шалгаруулж, уг төвийн ойролцоо буудал байрлуулахаар төлөвлөсөн нь ахмадуудын зорчих нөхцөлийг сайжруулах ач холбогдолтой гэж үзэж байна. “Энэрэл нигүүсэл оюун билгийн төв” ТББ-ын тэргүүн Ажиа гэгээн Лувсантүвдан ахмадуудад зориулсан өдөр өнжүүлэх үйлчилгээтэй уг төвд дасгал хөдөлгөөн хийх, эрүүл мэнддээ анхаарах боломж бүрдсэнийг онцолж, цаашид орчныг ногоон байгууламжаар тохижуулах ажлыг үргэлжлүүлнэ гэв.