УИХ-ын дарга Н.Учралын анхны гадаад айлчлал ОХУ-аас эхэлж байна
УИХ-ын дарга Н.Учрал ОХУ-ын Холбооны хурлын төрийн думын дарга Вячеслав Викторович Володины урилгаар 2026 оны хоёрдугаар сарын 9-өөс 12-ны өдрүүдэд Оросын Холбооны Улсад албан ёсны айлчлал хийх гэж байна.
УИХ-ын даргаар томилогдмогцоо Н.Учрал хамгийн түрүүнд АНУ-ын Элчин сайдыг хүлээн авч уулзаж байв. Шадар сайдаар ажиллаж байхдаа “Монгол-Хятадын экспо”-г бүс нутгийн том яармаг болгож, Францтай ураны гэрээ хийж, АНУ-аас Starlink, Apple Pay-г оруулж ирэх ажлуудыг гардан хийж байв.
УИХ-ын даргын хувьд хийж буй анхны гадаад айлчлалаа ОХУ-аас эхэлж байгаа нь түүний гадаад харилцаан дахь хамгийн олон талтай, нетерал байр суурийг илэрхийлж байна хэмээн судлаачид дүгнэж байна.
Энэ удаагийн айлчлалын зорилго нь Монгол Улс, ОХУ-ын иж бүрэн стратегийн түншлэлийг хөгжүүлэх, дээд, өндөр түвшний харилцан айлчлалын давтамжийг хадгалах, улс төрийн яриа хэлэлцээг үргэлжлүүлж, хууль тогтоох байгууллага хоорондын хамтын ажиллагааг өргөжүүлэхэд оршино. Улмаар улс төр, эдийн засаг, бизнес, худалдааны салбарын хамтын ажиллагааг хөгжүүлэхэд хууль, эрх зүйн таатай орчныг бүрдүүлэхэд чиглэж байна.
Айлчлалын үеэр УИХ-ын дарга Н.Учрал, ОХУ-ын Холбооны хурлын төрийн думын дарга В.В.Володин, Холбооны Зөвлөлийн дарга В.И.Матвиенко нартай тус тус албан ёсны уулзалт хийж, хөрш орнуудын уламжлалт харилцаа, парламент хоорондын хамтын ажиллагааны хүрээнд санал солилцоно.
Айлчлалын хүрээнд Монгол Улсын Их Хурал, ОХУ-ын Холбооны хурал хоорондын хамтын ажиллагааны хамтарсан комиссын хоёрдугаар хуралдааныг Москва хотноо зохион байгуулна. Улсын Их Хурлын дарга Н.Учрал мөн Евразийн эдийн засгийн комиссын Сайд нарын зөвлөлийн дарга Б.А.Сагинтаевтай албан ёсны уулзалт хийж, Монгол Улс болон Евразийн эдийн засгийн холбооны гишүүн орнуудын хооронд байгуулсан Худалдааны түр хэлэлцээрийг хэрэгжүүлэхтэй холбоотой асуудлаар санал солилцохоос гадна Монгол Улс-Евразийн эдийн засгийн холбооны бизнес хэлэлцүүлэгт оролцох юм байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.