Ирэх хоёр жилийн дотор 30 гаруй шувууны ААН нийт 3 сая шувуутай болж, жилд дунджаар 650 сая ширхэг өндөг үйлдвэрлэнэ
Хүнс, хөдөө аж ахуй, хөнгөн үйлдвэрийн яамны тооцооллоор ирэх хоёр жилийн дотор дотоодын 30 гаруй шувууны аж ахуй нийт 3 сая тоо толгой шувуутай болж, жилд дунджаар 650 сая ширхэг өндөг үйлдвэрлэнэ. Тэдгээр үйлдвэр 2026 оноос дотоодын өндөгний хэрэгцээг 100 хувь хангах боломж бүрдэнэ гэж тооцоолжээ.
“Түмэн шувуут” ХК Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөн, УИХ-ын 2022 оны Хүнсний хангамж, аюулгүй байдлын хангах 36 дугаар тогтоолын дагуу арилжааны банкны хөнгөлөлттэй зээлд хамрагдаж, өндөглөгч тахианы “Шувуу-2” үйлдвэрээ ашиглалтад оруулсан бол удахгүй “Шувуу-3” үйлдвэрээ ашиглалтад оруулахаар ажиллаж байна.
Бүрэн хүчин чадлаараа ажиллаж буй 2 үйлдвэртээ энэ онд 170 сая, ирэх жил 250 сая ширхэг өндөг үйлдвэрлэхээр төлөвлөжээ. Ирэх 2026 онд бүрэн хүчин чадлаараа ажиллаж эхэлснээр дотоодын өндөгний зах зээлийн 50 хувийг дангаараа хангах тооцоо гаргасан байна.
Өндөгний аж ахуйдаа түшиглэн тэжээлийн “Агро фийд” үйлдвэрийг барьж байгуулсан. Тус үйлдвэрт тахианы болон мал, амьтны тэжээл үйлдвэрлэж, 21 аймагт борлуулж байна. “Агро фийд” үйлдвэрийг өөрийн тариалангийн талбайд ургуулсан улаан буудай тэргүүтэй түүхий эдээр хангадаг онцлогтой иж бүрэн кластер хөгжүүлж байгаа юм. Энэ хүрээнд махны чиглэлийн “Дорпер” хонины үржлийн аж ахуйг мөн хөгжүүлж эхэлжээ.
“Хүнсний хувьсгал” үндэсний хөдөлгөөний үр дүнд хүнсний 53 үйлдвэр ашиглалтад орж байгаа нэг жишээ нь “Түмэн шувуут” ХК-ийн газар тариалан-боловсруулах-үйлдвэрлэлийн энэхүү сүлжээ юм.
“Хүнсний хувьсгал” хөдөлгөөний хүрээнд гол нэр төрлийн 19 бүтээгдэхүүнээр дотоодын хэрэгцээгээ хангах зорилт дэвшүүлсэн. Хөдөлгөөн хэрэгжсэн хугацаанд 3,000 гаруй аж ахуйн нэгж арилжааны банкны 1.2 их наяд төгрөгийн урт хугацаатай, хөнгөлөлттэй зээлд хамрагдаад байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.