Саудын Арабын Хаант Улсаас Монгол Улсад хавсран суух Элчин сайд Итгэмжлэх жуух бичгээ өргөн барив
Саудын Арабын Хаант Улсаас Монгол Улсад хавсран суух Элчин сайд Итгэмжлэх жуух бичгээ өргөн барив
Саудын Арабын Хаант Улсаас Монгол Улсад хавсран суух Элчин сайд Абдулрахман Ахмад Аль-Харби Монгол Улсын Ерөнхийлөгч Ухнаагийн Хүрэлсүхэд Итгэмжлэх жуух бичгээ өргөн барив.
Итгэмжлэх жуух бичгээ өргөн барьсантай холбогдуулан Монгол Улсын Ерөнхийлөгч хүлээн авч уулзан, Элчин сайдаар томилогдсонд нь баяр хүргэв.
Ерөнхийлөгч НҮБ-ын Цөлжилттэй тэмцэх конвенцын Талуудын ээлжит бага хурлуудыг Саудын Арабын Хаант Улс болон Монгол Улс тус тус хүлээн авч зохион байгуулах чиглэлээр олон улсын тавцанд харилцан уялдаатай ажиллаж буйд сэтгэл хангалуун байгаагаа илэрхийлэв.
Цаашид хамтын ажиллагааг худалдаа, эдийн засаг, хөрөнгө оруулалт, уул уурхай, хөдөө аж ахуй, байгаль орчин зэрэг салбарт хөгжүүлэх боломж байгааг тэмдэглэв.
Элчин сайд Абдулрахман Ахмад Аль-Харби Монгол Улсын Ерөнхийлөгчид Саудын Арабын Хаант Улсын Хаан, хоёр ариун сүмийг хамгаалагч Эрхэм дээд Салман бин Абдулазиз Аль-Сауд-ын халуун дотно мэндчилгээг уламжлав.
Мөн Монгол, Саудын Арабын харилцааг улам бэхжүүлэх, ялангуяа эдийн засгийн хамтын ажиллагааг өргөжүүлэхэд онцгойлон анхаарч ажиллахаа илэрхийлэв.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.
Одоогоор сэтгэгдэл байхгүй байна. Та анхны сэтгэгдлийг бичээрэй.